Жалал-Абад шаарынын мэриясынын кызматкерлери бүгүн жалпы жамааты менен донордук кандын камтыгын түзүү максатында кан тапшырышты. Бул тууралуу Жалал-Абад шаардык мэриясынын социалдык өнүгүү бөлүмүнүн башчысы Гулина Базаркулова билдирди.

Анын айтымында, буга чейин ыктыярдуу донордук кан тапшыруу боюнча шаар бийлигинин атайын буйругу чыгып, мекеме-ишканалар боюнча кан тапшыруу графиги түзүлгөн. Бардык мекеме-ишканаларда атайын түшүндүрүү иштери жүрүп, ошол түзүлгөн график боюнча кызматкерлер өз ыктыяры менен кан тапшыруу башталды.

- Биз да өз кезегинде башкаларга үлгү бололу деп, жамаатыбыз менен областтык кан бооруна барып, кан тапшырдык. Ал жерде кызматкерлердин канын текшерүүдөн өткөрүшкөн соң, көпчүлүк кызматкерлер кан тапшырууга мүмкүндүк алышты. Эми бизден башка да шаардык мекеме-ишканалар биздин демилген улап, кан тапшырууга активдүү катышат деп ойлойбуз. Анткени, бул нерсе көптөгөн энелер, балдарды өлүмдөн сактап калууга, саламаттыктарын чыңдоого реалдуу шарт түзөт, - дейт ал.

Эскерте кетсек, Жалал-Абад шаарында жыл сайын мекеме-ишканалар арасында жамааттык ыктярдуу кан тапшыруу демилгеси уланып келет.