Базар-Коргон районуна караштуу жаңгак токойлуу Арстанбап айылында жайгашкан «Келечек» балдардын эс алуу лагеринде 3 агым менен 400 бала эс алып, кечээ күнү үчүнчү агымдын жабылуу аземи болуп өттү.

“Келечек” эс алуу борборунун жетекчиси Ырыскан Калыгулованын айтымына караганда, бул эс алуу лагери Жалал-Абад ОИИБнын балансында турат. Балдардан сырткары лагерде 25 ардагер да эс алып, алар өздөрүнүн бай тажрыйбасы менен бөлүшүп, балдардын мекенчил болуп өсүүсү үчүн өздөрүнүн насааттарын беришти. Эс алуу борбору 120 балага ылайыкташкан. Анда милиция кызматкерлеринин, аз камсыз болгон үй-бүлөлөрдүн балдары жана «Ак-Жол» реабилитациялык борборунун да тарбиялануучулары эс алышты.

Үчүнчү агымдын жабылуу аземине КР Акыйкатчысы Кубат Оторбаев, Жалал-Абад ОИИБнын жетекчиси Жеңиш Жоробеков, УКМКнын облустагы башкармалыгынын башчысы Канжарбек Бокаев жана облустун казысы Абдулазиз Закиров катышты. Келген коноктор балдарды бош убактысын туура пайдаланууга, ар кандай жаман иштерден алыс болууга, спорт менен машыгууга чакырып кетишти.

Ал эми лагерде эс алып жаткан балдар анда келген конокторго арнап концерттик программаларын тартуулашты. Акырында КР Акыйкатчысы К.Оторбаев балдарга балмуздактарды таркатып, алар менен тамак үстүндө баарлашты.