Астана шаарын 2035-жылга чейин өнүктүрүүнүн Башкы планынын долбоору коомдук талкуу үчүн "Ачык нормативдик-укуктук актылар" порталына жарыяланды.

Ага ылайык, 2025-жылы шаар калкынын саны 1 миллион 480 миңге, 2035-жылы 2 миллион 275 миңге жетиши мүмкүн. 2035-жылга карата калаа жашоочуларынын 66% ишке жарамдуу курактагы адамдар түзөт.

Башкы пландын негизги максаттарынын бири катары "шаардагы жашоонун ыңгайлуулугу, анын ичинде турак жай менен камсыз болуу көрсөткүчү боюнча диспропорцияны жоюу" көрсөтүлгөн.

Башкы планга ылайык, 2021-2035-жылдардын аралыгында жаңы турак жай куруунун жалпы көлөмү 43 580,8 миң чарчы метрди түзүшү керек. Мындан тышкары 2035-жылга чейин калаадагы мектептердин санын көбөйтүп, азыркы 100 мектепке дагы 164 жаңы мектеп кошуу пландалууда.

2025-жылга карата шаарда 27 саламаттык сактоо объектисин куруу каралууда. Анын ичинен 13ү амбулатордук бейтапкана, үчөө 904 адам бата турган реабилитациялык борбор жана дагы үч башка саламаттык сактоо объектиси болот. Андан кийинки он жылдыкта (2035-жылга чейин) жалпысынан 62 саламаттык сактоо объектисин, анын ичинде үч оорукана, 53 бейтапкана, беш реабилитациялык борбор, дары-дармектерди экспертизадан өткөрүү борборун жана медициналык каражаттардын лабораториясын куруу пландалууда.

Башкы пландын долбоорун талкуулоо 24-ноябрдан 8-декабрга чейин уланат.