Пентагон аскердик жардамдын жаңы топтомунун алкагында Украинага Ми-17 тик учактары менен Humvee жолтандабастарын берүү ыктымалдыгын караштырып жатат. Бул тууралуу The Washington Post гезити Ак үйдүн өкүлүнө шилтеме кылып кабарлады.

Киевге бериле турган аскердик жардамдын жаңы топтому 750 миллион долларга бааланышы мүмкүн экени айтылууда. Азырынча анда курал-жарактын кайсы түрлөрү болору так аныктала элек.

The Washington Post'тун маалыматына караганда, Украинага жөнөтүлө турган жардамдын болжолдуу курамында гаубица замбиректери, жээкти коргоочу учкучсуз учуучу аппараттар, ошондой эле радиациялык, химиялык жана биологиялык коргоо каражаттары болот.

Өткөн жумада АКШнын Сенаты Украинага аскердик жана каржылык жардам көрсөтүүнү жеңилдеткен "ленд-лиз" программасын колдонууга уруксат берген мыйзамды колдогон. Бул программа акыркы жолу Экинчи дүйнөлүк согуш маалында колдонулган. Анда Америка нацисттик Германияга каршы күрөшкөн Улуу Британия менен СССР сыяктуу өлкөлөргө аскердик жардам көрсөткөн.

Буга чейин Түштүк Корея 1,5 миллион доллардан ашык суммага Украинага аскердик жардам бере турганын жарыялаган. "Рёнхап" агенттигинин маалыматына караганда, Сеул кийинки жумада Киевге бронежилеттерди, шлемдерди, медикаменттерди жана кургак азыктарды жөнөтөт. Азырынча Түштүк Кореянын Украинага учуучу аппараттарды берүү планы жок.