Тажикстандын «Ишкобод» чек ара тозотуна кол салуу маалында өлтүрүлгөн террорчулардын арасында аялдар менен балдар болгон. Бул тууралуу өлкөнүн тышкы иштер министри Сирожиддин Мухриддин Брюсселде өткөн Тажикстан менен Европа биримдигинин кызматташтыгы боюнча кеңештин жыйынынан кийин билдирди.

—20 адамдан турган куралдуу топ чек ара тозотуна кол салып, Калашников үлгүсүндөгү беш автоматты тартып алган. Атайын операциянын жүрүшүндө алардын көбү өлтүрүлүп, бешөөсү камакка алынган. Тилекке каршы, террорчулар кол салууда аялдар менен балдарды дагы колдонушкан. Бизде тандоо болгон эмес, — деди министр.

Тажикстандын Өзбекстан менен чектешкен аймагындагы «Ишкобод» чек ара тозотуна куралдуу кол салуу 6-ноябрга оогон түнү болгон. Андан 15 жоочу жок кылынып, бешөө кармалган. Тажик бийлиги чабуул учурунда бир милиционер жана бир чек ара кызматкери өлтүрүлгөнүн расмий маалымдаган. Ошол эле маалда «Азаттыктын» тажик кызматы өз булактарына таянып, беш чек арачы жана бир милиционер курман болгонун жазган.

Кол салуудан эки күн өткөндөн кийин чабуул үчүн жоопкерчиликти «Ислам мамлекети» террор тобу мойнуна алып, 10 чек арачы өлтүрүлгөнүн жарыялаган.