Кыргыз Республикасынын Президенти Сооронбай Жээнбеков бүгүн, 14-октябрда, эки күндүк иш сапары менен Баку шаарына (Азербайжан) Түрк тилдүү мамлекеттердин кызматташуу кеңешинин (ТТМКК) Жетинчи жыйынына катышуу үчүн келди.
ТТМККнын кезектеги жыйынында түрк тилдүү мамлекеттердин ортосундагы ар тараптуу мамилелердин, анын ичинде маданий-гуманитардык жана соода-экономикалык кызматташтыктын өнүгүү маселелери талкууланат.
Эске салсак, ТТМККда төрагалык кылуу Кыргыз Республикасынан Азербайжан Республикасына өтөт.
Ошондой эле ТТМКК жыйынына катышуунун алкагында бир катар эки тараптуу жолугушуулардын болушу күтүлүүдө.

Делегациянын курамында тышкы иштер министри Чыңгыз Айдарбеков, финансы министри Бактыгүл Жээнбаева, экономика министри Санжар Муканбетов, маданият, маалымат жана туризм министри Азамат Жаманкулов бар. Түрк кеңешин түзүү тууралуу келишим Нахчыван шаарында 10 жыл мурда түзүлгөн. Бул жолку саммитте Өзбекстан уюмдун мүчөсү болуп кабыл алынат.

Талкуулай турган маселелердин негизгиси - мамлекеттер ортосунда чакан жана орто ишкерликти өнүктүрүү жаатында кызматташуу багыттарын талкуулоо. Уюмдун буга чейинки жыйыны 2018-жылы Кыргызстанда өткөн. Ушул тапта ага Азербайжан, Казакстан, Кыргызстан жана Түркия мүчө. Венгрия уюмда байкоочу макамына ээ.