Үстүбүздөгү жылдын күз айларында Чаткал, Аксы, Ала-Бука райондорундагы мал чарбачылыгы менен алектенгендер үчүн эт комбинаты курулмакчы. Бул тууралуу Ала-Бука районунун акими Сонунбек Акпаралиев билдирди.

Анын айтымында, жалпы 105 жумуш орунду камсыздай ала турган эт комбинаты курулат. Комбинаттын курулушу менен Аксынын 130 миң калкы, Чаткалдын 50 миң эли, ошондой эле Ала-Буканын 100 миң эли үчүн жагымдуу шарт жаралат. Анткени күн сайын 30 баш майда жандык, 10 баш кара мал союлуп, эт азыгынан жасалуучу продукциялар даярдалып, Европа өлкөлөрүнө экспорттолот.

"Комбинаттын курулушун Ала-Бука райондук администрациясы колдоого алып, "Кыргыз эт" ассосациясынын төрагасы Рысбек Абдурасулов, жергиликтүү бийликтин өкүлдөрү жана фермерлер менен жолугушуу уюштуруп бердик. Жакынкы аралыкта Германиянын "Гернер" фирмасы комбинаттын курулушун баштайт", - деп кошумчалады С.Акпаралиев.

Белгилей кетсек, комбинатка союлуучу малдын баасы базар наркынан жогору сатылып алынат. Ошондой эле ветеринардык талаптар катуу коюлат.