11-июлда Жогорку сотто Азимжан Аскаровго тиешелүү кылмыш иши карала баштайт. Бул тууралуу Жогорку соттун билдирүүсүндө айтылат.

Ишти кайра кароого Аскаров жана анын жактоочусунун өтүнүчү себеп болду. Аскаровдун ишин Жогорку соттун кылмыш иштери жана административдик укук бузуулар боюнча коллегиясы карайт. Жараян ачык өтөт.

Азимжан Аскаровдун иши боюнча жаңы ачылган жагдайлар Бириккен улуттар уюмунун адам укуктары боюнча комитетинин чечимине тиешелүү болду. Ал кыргыз бийлигинен укук коргоочуну бошотуп, айыптаган өкүмдү жокко чыгарууну талап кылган.

Комитет өз чечимин Аскаров мыйзамсыз кармалган, кыйноого алынган, оор шарттарда кармалган деп түшүндүрдү. Жергиликтүү укук коргоочулар комитеттин бул чечимин колдошту.