Тажикстандын Вахдат шаарындагы колонияда 19-май күнү кечинде тополоң чыгып, үч түрмө кызматкери, 29 соттолуучу өлдү.

Тажикстан Юстиция министрлиги кабарлагандай, “Ислам мамлекети” террордук тобуна катышы бар соттолуучулар түрмөдөн качып кетүүгө аракет жасашкан. Өткүр темир, бычак менен куралданган тополоңчулар алгач түрмө кызматкерлерин барымтага алып, андан кийин колониянын үч кызматкерин өлтүрүшкөн. Андан соң өтө кооптуу делген 8 кылмышкерди изолятордон бошотушуп, абактагыларды коркутуу максатында беш кишини өлтүрүп, дагы ондогон адамды жаракат кылышкан.

Андан соң тополоңчулар колониянын медициналык бөлүгүн өрттөшүп, бир нече соттолуучуну барымтага алып, өздөрүн бошотууну талап кылышкан. Тополоңду басуу учурунда 24 соттолуучу өлтүрүлдү, 35 киши кармалды. Өлкөнүн башкы прокуратурасы кылмыш ишин козгоду.

Тополоңду милициянын атайын бөлүгүнүн мурдагы командири, кийинчерээк Сирияга чыгып кетип, "Ислам мамлекети" террордук тобуна кошулган Гулмурод Халимовдун уулу Бехруз, Фахриддин Гулов жетектегени айтылууда.

2018-жылы ноябрда Хожент шаарындагы күчөтүлгөн режимдеги түрмөдөн чыккан козголоңдон 23 киши өлгөн, алардын ичинде экөө күзөтчү болгон.