Өткөн апта соңунда, 2-июлдан тарта Жалал-Абад облусунун аймагында жол кайгуул кызматы менен кайгуул күзөт кызматынын (ППС) биригүүсүнүн натыйжасында  Патрулдук милиция (ПМ) бөлүмү ишке кирди. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, ачылуу аземге КР Ички иштер министри,  милициянын генерал майору Кашкар Джунушалиев жана ИИМдин жооптуу бөлүм башчылары, облустук бийлик өкүлдөрү, жарандык коом жана укук коргоо органдарынын жетекчилиги, Жалал-Абад ОИИБнын өздүк курамы жана ардагерлери катышты.

Ички иштер министри Кашкар Джунушалиев Жалал-Абаддагы патрулдук милиция бөлүмүнүн ачылышында, жаңы түзүлгөн патрулдук кызмат аз убакыт аралыгында эл ишенимине ээ болуп, калктын калың катмарына сиңүүсү керектигин айтты.

“Патрулдук милициянын кызматкерлери сылык-сыпайы болгула. Кайсы жаран кандай тартип бузса дагы жакшы мамиле жасагыла. Анткени, алар өзүбүздүн эле элибиз”, - деди ИИМ министри.

Эске салсак, К.Жунушалиевдин ишке киришүүсүндөгү алгачкы талаптарынын бири катары  15-июнда “КР Ички иштер органдарынын кызматкерлери жарандарга сылык жана кылдат мамиле кылуу жөнүндөгү” буйругу чыккан.

Аталган бөлүмдүн башкы милдеттерине чакыруу болгон учурда өз убагында баруу, ар кандай кырдаалда ыкчам аракеттер менен кылмыш ишин суутпай кармоо, унаа кырсыктарынын алдына алуу максатында жолдо жүргөн айдоочу жана жүргүнчүлөрдүн жол коопсуздугун сактоо, коомдук коопсуздукту камсыз кылуу негизги милдет болуп саналат.

Патрулдук милицияда ушул тапта облус боюнча 200гө чукул кызматкер эмгектенсе, бир суткада 3 нөөмөт менен 8 сааттан алмашып иштешет.

Белгилей кетсек, аталган кызмат үчүн Жалал-Абад шаарында жаңы имарат демөөрчү, колдоочу жана ПМ кызматкерлеринин жеке  каржылоосу менен оңдоп түзөөдөн өтүп,  пайдаланууга берилди.

ИИМдин патрулдук милиция башкы башкармалыгынын башчысы Эркин Баев Жалал-Абаддагы патрулдук милиция үчүн алдыңкы убактарда жаңы унаа маселеси чечиле тургандыгын билдирди.

Иш сапар учурунда министр Жалал-Абад ОИИБнын, Жалал-Абад ШИИБнүн, Сузак РИИБнүн өздүк курамы менен жолугушуулар болду.