Стамбулдагы Ататүрк аэропортунда теракт уюштурган үч жанкечти Орусия, Өзбекстан, Кыргызстан жарандары экендиги кабарланууда. Бул тууралуу Түркия өкмөтүнүн расмий өкүлдөрүнүн бири билдирген. Иликтөөлөрдүн чоо-жайы толук бүтпөгөндүгүнө байланыштуу маалымат берген адамдын аты-жөнү айтылган жок.

Өкмөттүк Yeni Safak гезити жоочулар Дагестандан экенин жазып чыкты. Басылманын маалыматы боюнча Ахмед Чатаев аттуу киши Чеченстандан чыккан. Ал “Ислам мамлекети” экстремисттик тобунун лидерлеринин бири катары эсептелет. Орус тилдүү жоочуларды топтоп жана даярдыктан өткөрүүгө жооптуу адам катары сыпатталууда. Чатаевди БУУ өзүнүн кара тизмесине киргизип, ага карата санкция жарыялаган.

Өз кезегинде терактты уюштурган үч жанкечтинин бири кыргызстандык деген маалыматты түрк тарап расмий тастыктай элек. Бул боюнча Стамбулдагы кыргыз консулдугу билдирген.

Ататүрк аэропортунда болгон жардырууларга катышы бар деген шек менен түрк полцииясы 13 адамды камакка алды. Алардын үчөө чет элдиктер экени маалым болду. Жергиликтүү маалымат каражаттарынын жазышынча, полиция бейшембиде Стамбулдун 16 районунда рейд жүргүзгөн.

Буга чейин, түрк бийликтери жардыруунун артында “Ислам мамлекети” экстремисттик тобу турушу мүмкүндүгүн боолгологон.

28-июнда кечке маал эл аралык Ататүрк аба-майданында болгон жанкечтилердин чабуулунан 42 адам мерт кетип, 230тан ашууну жарадар болду.