Жалал-Абад шаарындагы балдар бакчаларынын биринде тарбиялануучу наристелерге орой мамиле жасаган тарбиячы жана бала багуучу ээлеген кызмат орундарынан бошотулду. Бул тууралуу Жалал-Абад шаардык билим берүү бөлүмүнөн билдиришти.

Алынган маалыматтар боюнча, Жалал-Абад шаарындагы №21 балдар бакчасында тарбиялануучу менен бала багуучу балдарга орой мамиле жасаганы тууралуу видео-тасма социалдык тармактарга таркап кеткен. Ага Жалал-Абад шаарынын билим берүү бөлүмү дароо реакция жасап, учурда иште кемчилик кетирген тарбиячы Иляз кызы Ширин жана бала багуучу Мубина Дарманбекова ээлеген кызматтарынан бошотулушту. Ал эми балдар бакчасынын башчысы Оксана Щербинага ушундай кемчиликтерге жол бергени үчүн сөгүш жарыяланды.

- Мындай учур бизде биринчи жолу катталып жатат, мурда мындай факты болгон эмес. Биз билим берүү бөлүмүндө атайын жыйын өткөрүп, иштин жайын талкуулап чыктык жана тийиштүү кызматкерлерге мыйзамга ылайык тартиптик жаза чараларын көрдүк. Азыркы тапта башка бардык балдар бакчаларында мындай көрүнүштөрдү болтурбоо, алдын алуу боюнча иш-чараларды көрүп жатабыз. Буюрса, эми мындай терс көрүнүш бизде болбойт, - дейт шаардык билим берүү бөлүмүнүн башчысы Ырысбек Калчаев.

Бул терс көрүнүшкө Жалал-Абад шаарынын мэриясы да дароо реакция жасады жана шаардагы бардык балдар бакчаларындагы иштерге мониторинг жасоо боюнча буйрук чыкты.

- Биз атайын буйрук менен бардык балдар бакчаларындагы эмгектенип жаткан кызматкерлердин квалификациясын текшерип чыгуу үчүн комиссия түздүк. Аны шаардын вице-мэри жетектеп, курамы 5 кишиден турат. Максатыбыз мындан ары балдар бакчаларында терс көрүнүштөргө жол бербөө жана тарбиялык иштердин сапатын арттыруу, - дейт шаардын биринчи вице-мэри Майрамбек Адылбеков.

М. Адылбековдун айтымында, жүз берген терс фактыга укуктук баар берилиши зарыл, ошондуктан да шаардык ички иштер бөлүмү тарабынан бул боюнча кылмыш иши козголду жана прокуратура органдары тарабынан да текшерүү иштери жүрүп жатат. Анын жыйынтыгы менен тийиштүү кызматкерлерге укуктук баа берилет.