Газа секторун көзөмөлдөгөн ХАМАС кыймылы Израилдин түштүк жээгине 100дөн ашуун ракета коё берди. Ондогон ракета зыянсыздандырылды, айрымдары калк отурукташкан райондорго түштү. Алдын ала маалыматтар боюнча 13 Израиль жараны жаракат алды.

The Jerusalem Post басылмасы кабарлагандай, ракеталардын бири бош автобуска тийген, 19 жаштагы жигит жабыр тартты.

ХАМАСтын куралдуу канаты 12-ноябрга караган түнү жети палестиналык, анын ичинде кыймылдын командирлеринин бири аймакка кирип келген жөөт аскерлери менен атышуу учурунда каза тапканын билдирүүдө. Кыймыл Израилдин аскердик операциясына жооп иретинде бомбалоону баштай турганын жарыялады.

Айрым Батыш ММКлары атышуу учурунда бир израилдик жоокер өлгөнүн жазышты. Бирок бул маалымат расмий түрдө тактала элек.

Ракеталык аткылоолордон кийин Израиль аскерлери бир нече жолу Газа секторуна абадан сокку урду. Франс Пресс агенттиги эки палестиналык өлгөнүн жазды.