Кошмо Штаттар чет өлкөлүк пропаганда менен күрөшүү үчүн 40 миллион доллар бөлдү. Бул тууралуу АКШ Мамлекеттик департаментинин өкүлү Роберт Палладино билдирди.

Акчаны Глобалдык өз ара аракеттенүү борбору алды. Мекеме Орусия, Иран жана Кытай сыяктуу өлкөлөрдүн маалыматтык таасиринен коргоо чараларын камсыздоого жооптуу болот.

Кеп жалган маалыматтарды эрте аныктоо технологиялары, чет элдик аудиторияларды иликтөө, жергиликтүү ММКлар жана фейк жаңылыктардын бетин ачкан өкмөттүк эмес уюмдар менен байланышты өнүктүрүү жөнүндө болуп жатат.

Глобалдык өз ара аракеттенүү борбору Барак Обама президент болуп турганда түзүлгөн, ал АКШ Мамлекеттик департаментинин түзүмүнө кирет. Башында борбор көптөгөн өлкөлөрдө тыюу салынган “Ислам мамлекети” террордук тобунун пропагандасына каршы күрөшүү менен алектенген. 2017-жылдын башынан тарта уюм Орусия боюнча да иштей баштаган.

АКШда Орусиянын президенттик шайлоолорго ыктымал кийлигишүүсү иликтенүүдө. Москва айыптоолорду четке кагып келет.