Жалал-Абад шаарындагы Экономика жана ишкердик университетин 500 дөн ашык бүтүрүүчү аякташууда. Бул тууралуу аталган окуу жайда өткөрүлгөн бүтүрүү кечесинде маалым болду. 

Алынган маалыматка караганда, анын ичинде  ЭИУнин Үзгүлтүксүз ачык билим берүү институтунун, Эл аралык Кыргыз-Түрк институтунун, Гуманитардык-экономикалык колледжинин бүтүрүүчүлөрү бар. Бүтүрүү кечесине облустук жана шаардык жетекчилер, жеке ишкерлер, студенттердин ата-энелери катышышты. Кеченин башталышында ректорат тарабынан куттуктоолор айтылып, алдыңкы студенттерге ардак грамота, алкыш баракчалары жана акчалай сыйлыктар тапшырылды. Экономика жана ишкердик университетинин ректору Абдилбает Мамасыдыков бүтүрүүчүлөргө ак жол каалады.

-Урматтуу биздин окуу жайдын бүтүрүүчүлөрү, бүгүнкү бүтүрүү кечеңер куттуу болсун. Сиздер 5 жылдык, 3 жылдык аракетиңердин, талыкпаган эмгегиңердин арты менен жогорку окуу жайды аяктап жатасыңар. Мындан ары Кыргызстандын гүлдөп өсүшүнө жана экономикасына  чоң-чоң салымыңарды кошосуңар деген ишеничтебиз. Мындан кийинки сапарыңар байсалдуу болсун. Окуу жайдын окутуучулар жамаатынын атынан, жеке өзүмүн атыман силерге ак жол каалайм, - деди А.  Мамасыдыков.

Кеченин жүрүшүндө бүтүрүүчүлөргө жана келген конокторго арналып окуу жайдын студенттери тарабынан даярдалган майрамдык концерттик программа тартууланды.