Владимир Путин менен Дональд Трамптын жолугушуусу 11-ноябрда Парижде өтөт. Бул тууралуу АКШ президентинин Улуттук коопсуздук боюнча кеңешчиси Жон Болтондун Москвада Орусия президенти Владимир Путин менен кездешүүсү учурунда маалым болду.

Болтондун айтымында, жолугушуу Биринчи дүйнөлүк согуштун аякташынын 100 жылдыгына арналган мааракеге туш келет.

Болтон Путиндин кабыл алуусунан чыккандан кийин “Интерфакстын” баш кеңсесинде маалымат жыйынын өткөрдү. Ал АКШ орто жана кыска аралыкта учкан ракеталарды жоюу тууралуу келишимден чыкса, дүйнөгө коркунуч жаралбайбы деген суроого “Орусия ракеталарынын Европа аймагында жайгашуусу кооптуу” деп жооп берди.

АКШ президентинин Улуттук коопсуздук боюнча кеңешчиси Жон Болтон Москвадагы кеңешмелерде орто жана кыска аралыкка уча турган ракеталарды жоюу тууралуу келишим жана Трамптын андан чыгуу тууралуу чечими кылдат талкууланганын кабарлады.

Ал Москва келишим шарттарын сактабагандыктан, Вашингтон ушундай кадамга барып жатканын баса белгиледи.

Орто аралыктагы өзөктүк күчтөр боюнча келишимге мындан 31 жыл мурда, 1987-жылы ал кездеги СССРдин лидери Михаил Горбачев менен АКШнын ошол кездеги президенти Рональд Рейган кол койгон. Келишим учуу аралыгы 500дөн 5500 чакырымга чейин жетүүчү жана жерде жайгаштырылуучу канаттуу ракеталарды жасоого тыюу салган. Кытай бул келишимде камтылган эмес.