Шымкенттин Абай райондук соту социалдык түйүндөр аркылуу диний кастыкты козутууга айыпталган 29 жаштагы жергиликтүү тургун Имран Музаффаровдун ишин карап жатат. 3-октябрдагы отурумда ал күнөөсүн мойнуна ала турганын билдирди.

Андан соң судья Элеонора Бакирова коргоо тарап ишти кыскарылган тартипте кароону өтүнгөнүн айтып, дароо жарыш сөзгө өтүүнү сунуштады. Бирок прокурор даярдык үчүн убакыт сурагандыктан, жарыш сөз 4-октябрга жылдырылган.

«Диний кастыкты козутуу» беренеси менен айыпталган Имран Музаффаров дээрлик беш айдан бери камакта отурат. Ал бул айыптоо менен эки жылдан жети жылга чейин эркинен ажыратылышы мүмкүн.

Акыркы жылдары Казакстанда бул берене менен ондогон жарандык активист, блогер жана түрдүү диний коомчулуктардын өкүлдөрү соттолду.