Жалал-Абад шаарындагы тез жардам кызматынын жаңы имараты ишке берилип, андагылар үчүн ыңгаййлуу шарттар түзүлдү. Бул тууралуу шаардык тез жардам кызматынан билдиришти.

Алынган маалыматка караганда, тез жардам кызматынын эски имаратынын жанына жаңы имарат курулуп, ишке берилди. Мындан сырткары жаңы имарат үчүн кайрымдуулук фонд тарабынан баасы кымбат бир нече жаңы жабдуулар алынып берилген.

Жалал-Абад шаардык тез жардам бөлүмү облустук үй-бүлөлүк дарыгерлер борборуна карайт. Мурдагы имараттын эскилиги жеткендиктен, КР ӨКМ тарабынан иштөөгө болбойт деген тыянак чыгарылган.

Эски имараттын чатыры тешилип, катуу жаан-чачын учурунда шыптан тамчы өтүп, полдору да чирип калган болчу. Ушундай оор шартка карабастан, анда иштеген ден-соолук сакчылары элди күнү-түнү тейлеп келишкен.