Дональд Трамптын коомчулук менен байланышуу боюнча кеңешчиси Келли Сэдлер

АКШ президенти Дональд Трамптын коомчулук менен байланышуу боюнча кеңешчиси Келли Кэдлер 81 жаштагы сенатор Жон Маккейндин дарегине орунсуз тамаша айткандан кийин Ак үйдөн кетти. Бул тууралуу Reuters агенттиги кабарлады.

Өткөн айда жыйында сөз сүйлөгөн Сэдлер Чалгындоо кызматынын башчылыгына президент тараптан көрсөтүлгөн талапкер боюнча Маккейндин нааразылыгын көңүлгө албоону сунуштаган. «Өлүп бараткан саясатчынын пикири» маанисиз экенин айткан Сэдлердин бул сөздөрүн ММКлар жарыялап, коомчулукта кызуу талкуу жараткан.

Ак үй президенттин кеңешчисинин бул айткандарын төгүндөөдөн дагы, ырастоодон дагы баш тарткан. Азырынча Сэдлердин кызматтан алынгандыгы же өз каалоосу менен кеткендиги кабарлана элек.

Былтыр мээсинде айыкпас рак табылган Маккейн Трамптын администрациясынын ырааттуу сынчыларынын бири болуп келет. Вьетнамда 5 жыл туткунда болуп, кыйноолорго кабылган сенатор кесиптештерин Чалгындоо кызматынын башчылыгына көрсөтүлгөн Жина Хаспелдин талапкерлигине каршы добуш берүүгө үндөгөн.

Трамп 2015-жылы Маккейндин сиңирген эмгектерин тааныбай турганын айткан. «Ал туткунга түшүп калгандыгы үчүн гана согуштун баатыры деп эсептелинет. Мага болсо туткунга түшпөгөндөр жагат», — деген анда президент.