Ашхабадда азык-түлүк каатчылыгынан улам  дүкөндөрдө узун кезек жаралууда. Бул күндөрү кезекке тургандар айрым учурда урушуп, мушташып жатканын көрүүгө болот.

“Азаттыктын” түркмөн кызматы кабарлагандай, бир килограмм кант, бир килограмм ун, бир бөтөлкө суу май сатып алуу үчүн шаар тургундары дүкөндөргө таң ата электе келишүүдө. Кезек талашкан аялдар урушуп эле тим болбой, бири-биринин бетин тытканга чейин барышууда.

Соңку мезгилде азык-түлүк дүкөндөрүнүн алдында полиция менен атайын кызмат өкүлдөрүнүн саны көбөйдү.

«Ар бир дүкөндүн жанында 5-6 киши турат. Бирок мушташып жаткан аялдар менен алардын иши жок. Алар кезекке тургандар болуп жаткандарды сүрөткө тартып алышпасын деп турушат. Өлкөдөгү кыйынчылыктарга бийлик санааркабайт. Алар бул жагдай чет өлкөлөргө билинбесин, интернетке жазылбасын деп кабатыр болушат", - деди ашхабаддык тургун.