Мектеп окуучуларынын арасында болуп жаткан рэкетчилик көрүнүштөрүнө каршы канткенде натыйжалуу каршы турууга болот? Албетте, бул ишке ошол окуучулардын өздөрүн катыштыруу аркылуу гана. Ушундай максат менен Жалал-Абад шаарынын жаштар комитети окуучулар арасында рэкетчиликке каршы мазмундагы видео-роликтерге сынак жарыялаган.

Эми анын жйынтыгы чыгарылып, Жалал-Абад шаарындагы Бекмамат Осмонов атындагы мектеп-гимназиясынын окуучулары даярдаган видео-ролик жеңүүчү деп табылды. Бул тууралуу Жалал-Абад шаарынын жаштар комитетинин төрагасы Байышбек Ташбаев билдирди. 

Анын айтымында, окуучуларды коомдо болуп жаткан ушундай терс көрүнүштөрдөн өспүрүмдөрдү алыстатуу багытындагы даярдап келген видео-тасмалары калыстар тобунун назарына коюлду.

- Тасмаларда терс көрүнүштөрдүн келип чыгышы, аларды жаап-жашыруунун кесепеттери жана аларга каршы туруу зарылдыгы көрсөтүлдү. Катышуучуларга кызыктыруучу сыйлыктар, дипломдор жана акчалай сыйлык каралган. Максатыбыз өспүрүмдөр арасында рекетчиликтин алдын алуу жана аны болтурбоо, - дейт Б.Ташбаев.

Сынакка Жалал-Абад шаарындагы 18 мектеп катышкан. Эми жеңүүчү деп табылган мектеп окуучулары менен биргеликте кылмыштуулукка каршы жаңы тасма тартылып, мектептер арасында коюлмакчы.