Ала-Бука районунда болуп өткөн элдик жыйындын катышуучулары  2017-жылда жаратылган ийгиликтерди кеңири чагылдырган атайын стенддер менен таанышуу мүмкүнчүлүгүнө ээ болушту. Бул туурасында ыйгарым укуктуу өкүлдүн басма сөз катчысы маалымдады.

Ала-Бука районунда өткөн элдик жыйындын ишине ыйгарым укуктуу өкүлдүн орун басары Ырысбек Ызабеков, “Мамлекеттик камсыздандыруу уюму” ААКсынын төрайымы Жумагүл Эгембердиева жана облустук тармактардын бир катар жетекчилери катышты.

Ала-Бука районунда өткөн жыл ичинде жаратылган ийгиликтер туурасында Ала-Бука райондук мамлекеттик администрациясынын башчысы – аким Сонунбек Акпаралиев кыскача баяндама жасады. Анда белгиленип кеткендей, райондук өнүктүрүү фонду тарабынан 2017-жылы 17 долбоор жактырылып, аларды ишке ашырууга 105 млн. 260700 сомдук акча каражаттары бөлүнгөн. Жыл ичинде жаңы 12 ишкана ачылып, 93 жумушчу орундары түзүлгөн. Инвестиция тартуу иши максаттуу ишке ашырылуу менен 1 млрд. 608 млн. сомдук жумуштар аткарылды. Айыл чарбасында 6 млрд. сомдук дүң продукция өндүрүлгөн.

Ыйгарым укуктуу өкүлдүн орун басары Ырысбек Ызабеков “Жаңы доорго кырк кадам” долбоору жана “Таза коом” программасын ишке ашыруу боюнча келип чыккан милдеттер туурасында кыскача баяндама жасады. Аким Сонунбек Акпаралиев ыйгарым укуктуу өкүлдүн орун басары Ырысбек Ызабековдон Ала-Букадагы үй-бүлөлүк дарыгерлер тобуна караган поликлиниканы толук жаңылап курууга, быйылкы жылы курулуш иштери 90 пайызга бүткөрүлүп калган 2 мектепке каржылык маселесин чечүүгө көмөк көрсөтүү өтүнүчүн билдирип кетти.

    Жолдошбай Осмонов, Жалал-Абад облусу