Алматынын четиндеги Алгабас кичи районундагы авариялык абалды атайын комиссия иликтейт. Өткөн түнү имараттын бир тарабы кыйшайып кетип, жашоочулар көчүрүлгөн. Бул тууралуу “Азаттыктын” казак кызматы менен болгон маегинде Алатоо районунун акиминин орун басары Шахмерден Рысбаев билдирди.

—Алатоо районунун акимчилиги тургундарды мейманканаларга жайгаштырды. Мындан аркы кадамдар комиссиянын иликтөөсүнөн кийин белгилүү болот,— деди Рысбаев.

1-июнда, Алгабас-6 кичирайонунун 1/136 үйүнүн жашоочулары авариялык абалдан улам көчүрүлгөн. Соңку айларда тынымсыз жааган жамгырдын айынан турак-жайдын тегерегине суу топтолуп, натыйжада имараттын бир ыптасы кыйшайып кеткен.

Белгилей кетүүчү жагдай, бул үй өткөн жылы эле колдонууга берилген.