Бүгүн, 25-сентябрда КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев армреслинг – кол күрөшү боюнча дүйнө чемпионатынын коло медалынын жеңүүчүсү Аскат уулу Өткүрдү кабыл алды. Бул туурасында ыйгарым укуктуу өкүлдүн басма сөз катчысы маалымдады.

Быйылкы жылдын 5-сентябрынан 11-сентябрына чейин Венгриянын борбору Будапешт шаарында армреслинг – кол күрөшү боюнча дүйнөнүн 39-чемпионаты болуп өттү. Дүйнө чемпионатына 60тан ашуун мамлекеттин спортсмендери катышты. Дүйнө чемпионатына Кыргызстандан 11 спортсмен катышып, алар 1 күмүш жана 3 коло медалдын ээлери болушкан. Венгриянын борбору Будапешт шаарында армреслинг – кол күрөшү боюнча өткөн дүйнөлүк 69- чемпионатта 18 жашка чейинки өспүрүмдөр арасында 50 кг. салмакта 16 жаштагы Таш-Көмүр шаарынын тургуну Аскат уулу Өткүр сол колу менен таймашып, байгелүү коло медалдын ээси болуп калды.

Ыйгарым укуктуу өкүл Кыянбек Сатыбалдиев жаш спортсмен Аскат уулу Өткүрдү дүйнөлүк мелдештеги коло медалдын ээси болушу менен куттуктап, башына ак калпак кийгизди. Жаш спортсмен коло медалды колго киргизүүдө Казакстан, Россия, Түркмөнстан жана Өзбекстандан барган атаандаштарын жеңүүгө татыктуу болду. Келечегинен көптү үмүттөндүргөн Аскат уулу Өткүрдү Жалал-Абад облусунун ага машыктыруучусу Каныбек Эсенгелдиев тарбиялап жатат. Аскат уулу Өткүр спорттун армреслинг – кол күрөшү менен машыга баштаганына 2 жылдын жүзү болду.