Сауд Арабиясы Дүйшөмбүдө Тажикстандын парламенти жайгаша турган хансарай курмак болду.

Тажикстандын курулуш жана архитектура комитети парламенттик корпустун курулуш долбоору даяр экендигин маалымдады. Бул имарат Рудак сейил багынын маңдайында, азыркы шаар мэриясы менен айыл чарба министрлигинин ордуна тургузулмакчы. Бирок азырынча долбоордун наркы толук эсептелип чыга элек.

Сауд парламентинин төрагасы Абдуллох ибн Мухаммад ибн Ибрахим Оли Шейх Тажикстанга болгон иш сапарында бул маселени тажик парламентинин жогорку палатасынын төрагасы, баш калаанын мэри Махмадсаид Убайдуллоев менен талкуулаган. Анын айтымында, курулуш боюнча ушул жылдын январь айында Эмомали Рахмондун Сауд Арабиясына болгон иш сапарынын алкагында макулдашылган.