Аксы районуна караштуу Үч-Коргон айыл аймагындагы Кербен – Үч-Коргон ГЭС автожолунун 67 км. көпүрө катуу жааган жамгырдан кийинки селден улам авариялык абалга кептелип калган. Учурда жолчулар көпүрөнүн суу жеп кеткен жерлерине чоң таштарды ташташып, убактылуу ремонттоо жумуштарын жасашты. Бул туурасында ыйгарым укуктуу өкүлдүн басма сөз катчысы маалымдады.

Быйылкы жылы көпүрө толугу менен реконструкцияланып, капиталдык негизде кайра жаңыдан курулат.

- Аксы районуна караштуу Үч-Терек айыл аймагына караган  ички Кербен – Үч-Коргон ГЭС жолунун 67 км. көпүрө быйылкы жылы толугу менен кайрадан реконструкцияланып, жаңыдан курулат. Бул максатта КРнын транспорт жана жол министрлиги тарабынан республикалык бюджеттен 2 млн. 200 миң сом каражат каралды,- деди Жалал-Абад – Балыкчы автожол башкармалыгынын башчысы Камил Абдыкалыков.

Авариялык абалга тушуккан көпүрөнүн азыркы кездеги абалы менен ыйгарым укуктуу өкүл Кыянбек Сатыбалдиев, Аксы районунун акими Масалбек Мырзамамытов жана Жалал-Абад – Балыкчы автожол башкармалыгынын башчысы Камил Абдыкалыков жеринде барып көрүштү. Азыркы мезгилде жолчулар тарабынан сел алып, жууп кеткен көпүрөнүн негизги таянычтарына чоң таштар ташталып, кайрадан бышыкталып бекемделди.  Убактылуу ремонттолгон көпүрөдөн жүргүнчүлөр менен автотранспорт каражаттары тынымсыз каттап, өтүп жатышат. Аксы районунун Үч-Коргон айыл аймагында 22 миңден ашуун калк жашайт.

Жолдошбай Осмонов, Жалал-Абад облусу