Жалал-Абад шаарында 1-июнда белгиленүүчү Эл аралык балдардын коргоо күнүнө карата кызуу даярдыктар көрүлүп жатат. Бул тууралуу шаар мэриясынан билдиришти.

Шаар мэриясынын социалдык өнүктүрүү бөлүмүнүн башчысы Гулина Базаркулованын айтымында, быйылкы майрамды өзгөчөлөнгөн иш-чаралар менен өткөрүү каралды.

- Майрам күнү шаар борборунда балдар арналган маданий иш-чаралар, концерттик программа, башка да оюн-зооктор уюштурулат. Эс алуу бактарында ар кайсы атракциондордо балдар акысыз ойноп кетишине шарт түзүлөт. Ал үчүн балдарга алдын ала билеттер таркатылат. Ошондой эле,  балдарга 1 миң даана балмуздак, 500 даана таттуулар берилет. Ооруканалардагы, балдар үйүндөгү балдарга атайын көңүл бурулат. Барпы театрынын алдындагы аянтта балдардын асфальтка сүрөт тартуу сынагы өткөрүлөт. Балдардын “Ариет” чыгармачылык борборунун тарбиялануучулары атайын концерттик прграмма менен чыгышат. Бул чынында эле кеңири масштабдагы иш-чара болот, - дейт ал.

Шаар мэриясынан билдиришкендей, шаардагы “Ак-Бермет” үй-бүлө тибиндеги балдар үйүнө, “Каакым” балдар бакчасынын атайын тайпасына, балдардын социалдык станционардык мекемесине, кургак учукка каршы ооруканасынын балдар бөлүмүнө материалдык жардамдар көрсөтүлөт.