Сузак районунда “Спорт-тынчтыктын элчиси” деген ураан алдында мектеп окуучулары арасында райондук денгээлде спорттун үч түрү боюнча чоң масштаптагы мелдеш өткөрүлдү. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, жаш өспүрүмдөр арасында кылмыштуулукту алдын алуу, болтурбоо жана өспүрүмөрдү спорт дүйнөсү менен достошууга багыттаган спорттук мелдештин ачылуу аземине КР Өкмөтүнүн Жалал-Абад облусу боюнча ыйгарым укуктуу өкүлчүлүгүнүн бөлүм башчысы Кадыр Бечелов, Сузак районунун акиминин орун басары Асылкан Раманкулова,  облустук мусулмандардын казысы Абдулазиз  Закиров, Жалал-Абад ОИИБнын жетекчиси Жеңиш Жоробеков жана Түркиядан келген коноктор катышты. Иш-чара алкагында бийлик өкүлдөрү балдарга ийгилик каалап, спорт дени сак жашоого өбөлгө болоорун баса белгилешип, ак баталарын беришти.

Сузак райондук ички иштер бөлүмү уюштурган бул саамалык “Тарых жана маданият” жылына арналып,   волейбол, баскетбол жана футбол боюнча улан-кыздар арасында өткөрүлдү.  Тактап айтканда, алгач үч багыттагы мелдеш район аймагындагы бардык мектептин окуучулары арасында айыл аймактардын деңгээлинде өтүп, мелдештин 1-туруна жалпысынан 157 команда катышкан.  Бул командалар арасынан 29 командасы райондук мелдеште өздөрүнүн мүмкүнчүлүктөрүн көрсөтө алышты. Сузак РИИБнин башчысы Нурбек  Жаныбековдун айтымында, окуучулар мелдешке активдүү катышып беришти.

- Иш-чараны өткөрүүнүн бирден-бир максаты - ушул жаштар арасындагы рекетчиликти жоюу, кылмыштуулукту болтурбоо, сергек жашоого үндөө менен катар патриоттуулук сезимдерди күчөтүү, ар кандай терс көрүнүштөрдөн оолак жүрүүгө үгүттөө болуп саналат.  Ошол эле учурда окуучулар ортосундагы бири-бирине болгон биримдик, колдоо мамилеси жанданат. Мына ошондуктан, райондо жайгашкан ар бир мектептин окуучуларын да мелдешке тарттык. Балдар да мелдештерге өз командалары үчүн ынтызарлык менен ойношуп, жакшы беттешүүлөрдү көрсөтө алышты,  - деп билдирди Н.Жаныбеков өз сөзүндө.

Мелдеш жыйынтыгында, волейбол боюнча кыздар арасында Сузак айыл өкмөтүнүн А. Гайдаров мектебинин кыздары 1-орунду, Кыз-Көл айыл аймагынын О. Жапарбаев мектебинин окуучулары 2-орунду, 3-орунду Кара-Дарыя айыл аймагынын К.Калмамбетов мектебинин кыздары багындырышты. Балдар арасында болсо 1-орунду Сузак айыл аймагынын А. Абдукаимов, 2-орунду Сузак айыл аймагынын Ш. Абдраманов, 3-орунду Саты орто мектебинин балдары ээ болушкан.

Футбол оюну боюнча 1-орунду Тайгараев орто мектеби, 2-орунду М. Маткеримов,  3-орунду А. Абдукаимов орто мектебинин балдары багындырды. Бардык жеңген командаларга дипломдор жана баалуу белектер берилди.