БУУ, ЕККУ, АКШ, Улуу Британия, Франция жана башка бир катар өлкөлөр Орусиянын Түркиядагы элчиси Андрей Карловдун өлтүрүлүшүн айыпташты. Ал Анкарадагы куралдуу кол салуудан алган жараатынан улам каза болгон.

Элчиге Анкарада өтүп жаткан «Орусия түрктөрдүн көзү менен» аттуу сүрөт көргөзмөсү маалында кол салуу болгон.

Haber Turk порталынын маалыматы боюнча элчини Анкара полициясынын мурдагы кызматкери өлтүргөн. Ал быйыл жайында болгон Түркиядагы мамлекеттик төңкөрүш аракетин иликтөөнүн жүрүшүндө жумуштан алынган. Кол салуу маалында ал Сирия жана Алеппо үчүн өч алып жатканын айтып кыйкырган. Окуядан көп өтпөй полиция тарабынан өлтүрүлгөн.

Көргөзмөдө жүрүп, окуяга күбө болгон Кыргызстандын Түркиядагы элчиси Ибрагим Жунусов "Азаттыкка" буларды айтты:

- Өзбекстандын элчиси, мен жана Андрей Карлов көргөзмөдө катар сүйлөшүп турганбыз. Бир жигит ары-бери басып жүргөн. Аны жан сакчы деп ойлоптурмун. Карлов сөз алып, сүйлөй баштаганда эле тарсылдатып туш тарапка аткылай баштады. "Аллах акбар, баарыңар жерге жаткыла" деп кыйкырды. Мен айдоочум менен эле баргам, жарадарлардын арасында кыргыздар жок. Көргөзмөдө жалпысынан 150дөй адам бар болчу.

NTV түрк телеканалы кол салуудан дагы 3 киши жаракат алганын билдирди.

62 жаштагы Андрей Карлов 2013-жылдан бери Орусиянын Анкарадагы элчиси болуп иштеп келген.