Жалал-Абад облустук кан борборунун адистери облустук клиникалык ооруканасынын медайымдарын кан куюу ыкмасы жана лабораториялык аныктоо боюнча  атайын даярдыктан өткөрүү үчүн окуудан өткөрүшүүдө. Бул тууралуу борбордун усулдук уюштуруу бөлүмүнүн башчысы, дарыгер-методист Зулайка Сабырканова билдирди.

Анын берген маалыматына караганда, бул окууну өткөрүүнүн максаты – кан кетүүнүн алдын алуу жана лабораториялык кан тайпаларын туура аныктоо, кан куюу мезгилинде жабаркоолордун алдын алуу болуп саналат. Сабакты кан даярдоо бөлүмүнүн башчысы Айчүрөк Капарова жана имунологиялык лабораториянын башчысы Саламат Малабаева өтүп жатат.

“Бул окуулар бизде 20 жылдан бери эле өткөрүлүп келе жатат. Биздин окууларга жакынкы район-шаарлардан кан куюу ыкмасы боюнча иштеген медайымдар катышат”, - дейт З.Сабырканова.