Казакстан Инвестиция жана өнүгүү министрлиги улуттук темир жол компаниясын өзгөртүп кайра түзүүгө даярдап жатканын билдирди. Өкмөттөн кабарлашкандай, “Казакстан темир жолу” түзүмүнөн “КТЖ-Инфраструктура” өзүнчө бөлүнүп чыгат.

Мындай кадам инфраструктура жана ташуучу ишмердүүлүктү өз-өзүнчө жүргүзүү зарылдыгынан келип чыкты. Өлкөдө 2020-жылга чейин тармакты өнүктүрүү боюнча стратегия жана пландар иштелип чыккан.

«КТЖ-Инфраструктура» улуттук жана жеке ташуучуларды темир жол түйүнү менен камсыздайт.

Темир жол компаниясынын былтыркы кызмат көрсөтүүсү 750 миллиард теңгени (2,2 миллиард доллар) түзгөн. «Казахстан темир жолы» компаниясынын сайтындагы маалыматка караганда, Казакстандын темир жол тармагында 156 миң адам (өлкө калкынын 9 пайызы) иштейт.

«Казахстан темир жолы» компаниясынын жалгыз акционери болуп «Самрук-Казына» фонду эсептелет. Ал өз кучагына ондогон улуттук компанияларды камтыйт.