Эгемендүүлүктүн 25 жылдыгын утурлай Жалал-Абад ОИИБдин демилгеси менен өкмөттүн облустагы ыйгарым укуктуу өкүлчүлүгүнүн жетекчилиги астында «Кызматташуу-2016» аталыштагы аскердик жөө жүрүш болуп өттү. Бул тууралуу Жалал-Абад ОИИБнын басма сөз кызматы билдирди.  

Алынган маалыматка караганда, «Мекеним менин – Кыргызстан» долбоорунун алкагында өткөн иш чаранын негизги максаты – өлкөнүн бүтүндүгү үчүн чеп болгон аскерлердин биримдигин чыңдоо, элдин журт сакчыларына болгон ишенимин жаратуу, аскердик ыкмаларды жаш кызматкерлерге үйрөтүү жана тарбиялоо аркылуу өз ара кызматташуусун күчөтүү болуп саналат.

Жөө жүрүш таңкы саат 5тен тарта башталып, белгиленген жерге жеткенге чейин жөө жүрүштүн катышуучулары Сузак районунун борборун, Жийде жана Достук айылдарын аралап 142 килеметрден тарта 25 км аралыкты каз катар тизилип чуркап басып өтүштү. Андан соң иш-чаранын тартибине ылайык, ок атуу, граната ыргытуу, аркан тартыш, унаа сүйрөө, оор таш (гиря) жана тулку боюн көтөрүү сыяктуу бир топ спорттук мелдештер өтүп, эң жакшы көрсөткүчкө жеткен аскерлер “мыкты” деп аталышып, ОИИБнын ардак баракчалары менен сыйланышты.

Ошондой эле, аскердик талаа ашканасы уюштурулуп, аскерлер тарабынан патриоттук сезимдерди жогорулатуучу ырлар жаңырды.

Аскердик жөө жүрүшкө Жалал-Абад ОИИБдин район-шаарларындагы бөлүмдөрү, УКМКнын, Бажы кызматынын, Экономикалык кылмышка каршы күрөшүү мамлекеттик кызматы, ӨКМдин куткаруу кызматы, Тез жардам медициналык кызматы, Ооган жана Баткен коогалаңынын катышуучулары, Аскер комиссариаттарынын кызматкерлери, резервдик курам жана ИИО ардагерлери кошулуп, жалпы миңге чукул мекен коргоочулар катышты.