Чаткал районунун Терек-Сай айыл аймагында 2016-жылдын 6-августунда саат 17:20 чамасында болгон мөндүр аралаш катуу жааган жамгырдын кесепетинен сел жүрүп, натыйжасында Терек-Сай айылында сел сайлардан суу ашып жалпысынан 26 турак-жайдын огород участкаларын жана айланасын кум-шагыл каптап, анын ичинен 4 турак-жайдын ичине суу кирген. Бул тууралуу КР ӨКМнин басма сөз кызматы билдирди.

Алынган маалыматка караганда, 4 турак-жайдын ичинен 1 турак-жай жараксыз абалга келип, 3 турак-жай көзөмөлгө коюлган. Райондук электр ишканасынына караштуу 2 даана мамычасы авариялык абалга келген. Чымканаев атындагы мектептин айланасы кум-шагалдарга толуп калган. Ошондой эле, айыл ичиндеги 8 чакырым ички чарбалык жол кум- шагалдарга толуп, каттого кыйынчылыктар жаралган жана Мырзабаев, Рудничная, Школьная көчөлөрүндөгү селканалдардан суулар ашып, кум-шагылга толгон.

№17 жол тейлөө ишканасына караштуу Терек-Сай-Ала-Бука унаа каттамынын Шалдыр участкасында сайлардан келген аска таштар сел өткөрүүчү курулмаларга батпай ашып, 100 метр аралыгы кум-шагалдарга толуп , жолдун бетин жууп кетип, жол каттамы 2-3 саатка жабылган. Кош көпүрөнүн сол түркүгүнүн бир жагын 1,5 метр жерин сел жеп кеткен. Көпүрөнүн абалы канаттандырарлык абалда.

Кырсыктын кесепеттерин жоюу иштерине КР ӨКМнин Жалал-Абад облустук башкармалыгынын ыкчам тобу, райондук Жарандык коргонуу комиссия, КР ӨКМнин №79 өрт-куткатруу бөлүмүнөн 10 адам,  «Эти Бакыр Терексай» ЖЧК 2 экскаватор, 1 жүктөгүч, 2 самосвал, «Евентус» ЖЧК 1 жүктөгүч, 1 самосвал, «Фулд Голд майнинг» ЖЧК 2  Хово, айыл аймагынан 1 экскаватор 1 КРАЗ самосвал жана жергиликтүү калктан 103 адам, райондук жалпы дарыгерлик практикалык борборунан 1 тез жардам унаасы менен 7 кызматкер жана орууларды алдын алуу жана МСЭК (санэпид) борборунан 4 кызматкер, райондук №17 жол тейлөө ишканасы тарабынан 1 грейдер жана Ала-Бука районунун №27 жол тейлөө ишканасы тарабынан 1 эксковатор тартылган.

“2016-жылдын 7-августунда жеринде тактоо иштерине, КР ӨКМнин  Жалал-Абад Облустук башкармалыгынын башчысынын убактылуу милдетин аткаруучусу А.Т. Бекилов башында турган ыкчам топ райондук Жарандык коргонуу комиссиялары менен биргеликте тактоо иштерин жүргүзүшүүдө”, - деп билдирет басма сөз кызматы.

Айыл аймагы жана райондук Жарандык коргонуу кызматтары тарабынан сел  калдыктарын тазалоо жана калыбына келтирүү иш-чаралары уюштурулуп, 9 турак-жайдын айланасы сел калдыктарынан жана 100 метр сел сайлары тазаланды. Жараксыз абалга келген 1 турак-жайдын жашоочулары туугандарынын үйүнө көчүрүлдү.

Райондук жалпы дарыгерлик практикалык борборунун кызматкерлери тарабынан 137 адамды текшерилип, психологиялык жактан жардам көрсөтүлдү. Орууларды алдын алуу жана МСЭК (санэпид) борборунун кызматкерлери 26 турак-жайды кыдырып, залалсыздандыруу жумуштарын жүргүзүшүүдө.

Учурда райондук № 17 жол тейлөө ишканасына караштуу Терек-Сай-Ала-Бука унаа жолунун Шалдыр участкасында жолду жана 1 көпүрөнү калыбына келтирүү иштери жүрүп жатат.