Жалал-Абад облусунун айрым аймактарында жай мезгилиндеги өрт кырсыктарына каршы иш-чаралардын болгондугуна карабастан, кургак чөптөрдү өрт каптаган фактылар көп катталууда. Бул тууралуу Жалал-Абад облустук өрткө каршы мамлекеттик кызмат башкармалыгынын өрттүн алдын алуу бөлүмчөсүнүн инспектору Каныбек Маматкулов билдирди.

Анын айтымында, быйылкы жай айларында облус аймагындагы кургак чөптөрдү 88 жолу өрт кырсыгы каптаган, жалпы 470 гектарга жакын жер аянты өрттөн жабыр тарткан. Тилекке каршы, бүгүнкү күнгө чейин этиятсыздыктан улам өрт кырсыктары Сузак, Базар-Коргон, Ноокен райондорунда жана Жалал-Абад шаарында көп катталган.

- Ушундай жагымсыздыктарды алдын алуу максатында Жалал-Абад облустук өрткө каршы мамлекеттик кызмат башкармалыгынын район-шаардык бөлүмдөрү, жергиликтүү бийлик органдары менен биргеликте айыл тургундарына түшүндүрүү иштерин алып барууда. Бирок, жергиликтүү калктын кайдигер мамилесинен улам жагымсыз жайгдайлар түзүлүп калууда, - дейт ал.