Түркмөнстан президентинин атайын буйругуна ылайык, окуу жай жоюлуп, анын базасында Огузхан атындагы Технологиялык университет ачылды. Мындай кабарды «Азаттыктын» түркмөн кызматынын Ашхабаддагы булагы билдирди.

Жоюлган университеттин студенттери өлкөдөгү башка окуу жайларга которулду. Азырынча окуу жайдын жабылышынын себептери белгисиз. Жыл сайын түркмөн-түрк университети 200дөн ашык кишини кабыл алып келген.

Университет 1993-жылы негизделип, ишин 1994-жылы баштаган. 2013-жылдын майында Түркмөнстан менен Түркиянын президенттеринин катышуусунда түркмөн-түрк университетинин 3 миң кишиге ылайыкташкан жаңы имаратынын курулушу башталган.

Ушул жылдын 16-июлга караган түнү Түркиядагы аскердик төңкөрүш жасоо аракетинен кийин өлкө президенти Реджеп Тайып Эрдоган козголоңду уюштурууга Фетхуллах Гүленди айыптаган. Ал 1999-жылдан бери АКШда качып жүргөн диний ишмер. 2016-жылдын майында Гүлендин «Хизмет» («Кызмат») кыймылы Түркияда террорчул уюм деп табылган.

Түрк бийлиги «Хизметтин» миллиондогон тарапташтары бар экенин жана дүйнөнүн 150 өлкөсүндө мектеп окуучуларын университеттерге даярдай турган миңге чукул окуу борборлоруна демөөрчүлүк кыла турганын билдирип келет. Түркия башка өлкөлөргө кайрылып, Гүленге байланышы бар окуу жайларды жабууга чакырган.