Үстүбүздөгү жылдын сентябрь айында Ысык-Көлдө өтүүчү экинчи дүйнөлүк көчмөндөр оюндарында  Жалал-Абад облустук Барпы атындагы драма театрынын жана Токтосун Тыныбеков атындагы филармониясынын үч өнөрпоздорунун катышуусунда  “Курманбек баатырдын эрдиктери” аттуу спектаклден үзүндү аткарышмакчы.

Маданият министрлигинин алдында түзүлгөн көчмөндөр оюндарын өткөрүү жана  уюштуруу иштери боюнча  кординатору  Зарылбек Молдобакировдун айтуусунда, азыркы учурда жакындап келе жаткан бул чоң фестивалга карата облустардагы  маданият кызматкерлеринин даярдыктары көздөн өткөрүлүүдө.

Азыркы тапта сектаклден үзүндүнү Барпы драма театрынын режиссёру Кыргыз республикасынын эмгек сиңирген артисти Бакыт Жумалиев сахналаштырууда.

- Аталган спектаклди биз көчмөндөр оюндарынын жүрүшүндө көрүүчүлөргө тартууламакчыбыз. Мында негизинен Курманбек баатырдын эрдиги, эли-жери үчүн жанын аябаган образы чагылдырылат. Андан тышкары, оюндардын жүрүшүндө биздин актёрлор тарабынан нукура кыргыз баалуулугу болгон кыз узатуу  сыяктуу салттар сахналаштырылып көрсөтүлмөкчү. Учурда чыгармачылык топ ага карата кызуу даярдыкта, - дейт З.Молдобакиров.