Таш-Көмүр шаарынын мэри Бекболот Миңбаев Кыргыз Республикасынын Өкмөтүнө көптөгөн кайрылууларды жасап жатып, ГЭСтерден 32 миллиондон 40 миллион сомго жакын салыктарды шаардын бюджетине түшүргөн.

Шаар мэри Б.Миңбаевдин айтымына караганда, 2013-жылы жаңы ишке кирген мезгилде шаардын чарбачылыгы бюджеттин тартыштыгынан улам абдан оор абалда болгон. Шаардын жалпы бюджети 32 млн. сом болгон, андан сырткары 12 миллион сомдук дотацияда отурган.

- Мен келерим менен биринчи маселе катары салыктан, салык эмес түшүүчү каражаттарды жана ГЭСтердин түшүүчү салыктарды шаардын бюджетине төкпөй-чачпай түшүрүү максатын көздөдүм. Бүгүнкү күндө ГЭСтерден түшкөн 40 миллион сомго чейинки салыктардын эсебинен Таш-Көмүр шаарынын бюджети 2016-жылга 88,5 миллион сомду түздү, - дейт Б.Миңбаев.

Андан сырткары, шаардык муниципалдык менчик департаментине шаар калкынын кайрылууларын эске алып, шаардагы күнүмдүк кыйынчылыктарды четтетүү максатында “Портер”, суу ташуучу унаа, автовышка, экскаватор автотехникаларын сатып алышкан. Ал техникалар азыр эл кызматында иштеп жатат.