Бүгүн, 7-май күнү Жалал-Абад шаарынын Барпы театрынын алдында КР Улуттук Кызыл Ай коомунун облустагы өкүлчүлүгү өздөрүнүн түзүлгөндүгүнүн 90 жылдыгана карата студенттердин жана мектеп окуучуларынын катышуусунда атайын иш-чара өткөрүшүп, анда коом менен тыгыз кызматташтыкта иштегендерге белектер, дипломдор тапшырылды.

КР Улуттук Кызыл Ай коомунун Жалал-Абад облусундагы өкүлчүлүгүнүн өзгөчө кырдаалдар боюнча координатору Каныбек Кудайбердиевдин айтымында, Эл аралык “Кызыл крест” уюму женевалык ишкер, соодагер  Анри Дюнан тарабынан 1863-жылы 8-майда уюштурулган. Кыймылдын түзүлгөн күнүнө карата ыктыярчылар менен мектеп окуучуларынын арасында асфалтка сүрөт тартуу сынагы жана дарыгерлер, диний чөйрөнүн, ар улуттун өкүлдөрүнөн түзүлгөн командалар арасында футбол боюнча спорттук мелдеш өткөрүлөт.

Швейцариялык соодагер Анри Дюнан  1859-жылдын июнунда Франциянын императору Напалеон-3кө жолугушуу үчүн баратып, Түндүк Италияны басып өткөндөн кийин, француз жана австралиялык жоокерлердин салгылашуусуна дуушар болуп, ал согуш талаасында өлүм менен өмүр ортосунда жаткан жарадарларга жардам берүү үчүн ошол жердеги чиркөөгө убактылуу госпитал түзүп, ага жергиликтүү эл да жардам берген. Швейцарияга кайтып келгенден кийин Э.Дюнандын бул окуя боюнча “Санферино жөнүндө эскерүү” деген китеби 1862-жылы чыккан, ал согуш учурунда жоокерлерле жардам берүү боюнча бейтарап уюм түзүүнү сунуштаган.

“Уюм саламаттыкты сактоо,  социалдык кароо, өзгөчө кырдаалды башкаруу, уюштуруу тармагын өнүктүрүү багытында иш алып барат. Кыргызстанда биринчи жолу коомдук бирикме катары 1926-жылы Кыргыз АССРнин Кызыл Чырым Коому болуп түзүлгөн. !992-жылдан тартып Кыргыз Респубуликасында жалгыз, көз карандысыз, гуманитардык, ошону менен бирге эң байыркы бейөкмөт уюм болуп саналат.  Саламаттыкты сактоо жана социалдык коргоо тармактарында иш алып барат. Негиздөөчү принциптери: ыктыярдуулук, көз карандысыздык, бейтараптуулук, гумандуулук, ар таратуулук, биримдик, калыстык болуп саналат”, - дейт К.Кудайбердиев.