Жалал-Абад шаарынын өрткө каршы кызматынын эмгек жамааты кошуна турган Сузак районундагы Кара-Дарыя айыл өкмөтүнүн аймагындагы суу каптоо коркунучунда калган жарандарга жардам беришти. Бул тууралуу Жалал-Абад шаардык өрткө каршы мамлекеттик кызмат бөлүмүнүн башчысынын орун басары Кубанычбек Токтосунов билдирди.

Анын айтымында, мындан бир нече күн мурда Кара-Дарыя суусуна курулган дамбанын оң жэгиндеги 15 метр аралыгын суу жеп кеткендиктен, айыл калкынын үлүштүк жери эсептелген 6 гектар күрүч аянттарын суу каптаган. Андан ары сууга жакын жайгашкан Бостон участкасында турак жайларды каптап кетүү коркунучун келтирген.

Абалды ыкчам жөнгө салуу үчүн Жалал-Абад шаардык өрткө каршы мамлекеттик кызмат бөлүмүнүн №20 аскерлешкен өрткө каршы бөлүгү менен №58 өрткө каршы куткаруу бөлүгүнүн 1 авариялык куткаруу автоунаасы жана 45 кызматкер кырсык катталган аймакка барышкан. Ал жерде мүшөктөрдү шагыл менен толтуруп, сууга бөгөт коюу менен айылды суу каптоо коркунучун жоюу иштерине катышышкан.

- Биздин кызматкерлер калкты бир гана өрт кырсыктарынан сактап калбастан, ар кандай өзгөчө кырдаалдар убагында жакындан жардам көрсөтүп келет. Буга чейин да ушундай болуп келген, эми да биз тезинен жардам керек болгон жерге барып, кол кабыш кыла бермекчибиз, - дейт К. Токтосунов.

Сузак районунун Кара-Дарыя айыл аймагынын жетекчилери кошуна Жалал-Абад шаарынын өрткө каршы кызматынын активдүү жардамына ыраазылык билдиришти.