Эл аралык издөөдө жүргөн Жалал-Абад шаарынын Хаджибаева көчөсүнүн тургуну 1963-жылы туулган Мулабаев Махамматжан Юсупович  Жалал-Абад ШИИБнүн ыкчам кызматкерлери тарабынан кармалды. Бул тууралуу ОИИБнын басма сөз кызматы билдирди.

Алынган маалыматка караганда, ал буга чейин 2003-жылы “Хизбут-Тахрир” экстремисттик уюмун колдоп, диний кастыкты козутуу фактысы менен 3 жылга шарттуу соттолгон. 2011-жылы кайра эле жогорудагы мыйзамсыз уюмду  колдоп, эл арасында үгүттөө иштерин жүргүзгөндүгү аныкталып,  КР КЖКнин 299-беренеси (Диний кастыкты козутуу) менен Жалал-Абад ШИИБнүн тергөө бөлүмү  тарабынан кылмыш иши тергелип, айыбы угузулуп сотко жиберилген.

Бирок соттук отурумга катышпастан, изин жашырып качып кеткен. Мулабаев Махамматжан 2012-жылдын  апрель айынан эл аралык издөөгө алынган жана Россия Федерациясынын Дагестан республикасында качып жүргөн.

Жалал-Абад ШИИБ жана Жалал-Абад шаардык прокуратурасы менен биргеликте  М.Мулабаевдин Кыргызстанга келээр күнү аныкталып, аткарылган ыкчам маалыматтын негизинде бүгүн, 29-июль күнү таңкы саат 04:00 чамаларында Манас аэропортунан Жалал-Абад ШИИБнүн  ыкчам өкүлдөрү тарабынан кармалды.

Азыркы учурда М.М.Юнун мыйзамсыз уюмдар менен байланыштыгы  жана башка кылмыштарга тиешеси бар же жоктугу боюнча ыкчам тергөө амалдары жүргүзүлүүдө.