Үстүбүздөгү жылдын июль айынын башынан бери Сузак районунун Лавдан-Кара айылында “маньяк пайда болуптур”  деген ушак сөз эл арасында пайда боло баштаган. Себеби, аталган райондун аймагындагы  5 үйгө белгисиз кылмышкер беткап кийип түн ичи бастырып кирип үй ээлеринин мойнуна бычак (отвертка, кайчы) такап коркутуп акча, зергер (алтын) жана үй буюмдарын уурдап кетип жаткан.  

Жалал-Абад ОИИБнын басма сөз кызматынын берген маалыматына караганда, каракчы жалаң жалгыз бой жашаган аялдардын үйүнө кирген жана “бирөөгө айтсаң өлтүрөм” деп коркутуу жолу менен кылмыш жасап жүргөн. Ал эми айрымдарын “акча таппасаң зордуктайм” деп да опузалаганын жабырлануучулар өз арыздарында билдиришкен.

Ал акыркы жолу 22-июлдан 23-июлга караган түнү саат 02:30 чамасында адаттагыдай Сузак районунун Благовещенко айылындагы үйлөрдүн бирине кара түстөгү беткап  кийип алып  бастырып кирип,  колундагы бычагы менен  21 жаштагы кызды коркутуп, акча издей баштаган учурда кыз каршылык көрсөтүп, колунан бычагы түшүп кеткенде терезеден секирип качып кеткен.

Жабыр тарткан жарандар милицияга арыз менен кайрылып, аталган фактылар  боюнча Сузак РИИБнүн  оперативдик  тобу  толук курамында окуя болгон жерге барып, кароо жүргүзүлүп тиешелүү материалдарды топтошкон жана КР КЖКнин 167-беренесинин 4-бөлүмүнүн 1-пункту (Тоноо) менен кылмыш иши козголуп, кылмыштын бетин ачуу максатында жүргүзүлгөн ыкчам иш-аракеттеринин натыйжасында 26-июль күнү шектүү катары Сузак районунун 19 жаштагы Ч.Р. аттуу тургуну Сузак РИИБнүн кызматкерлери тарабынан кармалды.