Шымкенттин акимчилиги акыркы төрт айда үчүнчү жолу чет өлкөлүктөргө жер сатуу жана ижарага берүүгө каршы митинг өткөрүүгө макулдук берген жок.

“Азаттыктын” казак кызматына активист Ибрагим Алсерке кабарлагандай, бул маселеге кайдыгер эмес жарандар 30-июлда тынчтык акциясын өткөрүү боюнча акимчиликке билдирме ташташкан. Митинг Абай паркындагы Даңк мемориалынын алдында болмок. Бирок жергиликтүү бийлик алардын өтүнүчүн четке какты.

— Даңк мемориалынын чеке-бели 30-31-июлда тазаланат деген шылтоо менен акимчилик митинг уюштурууга уруксат берген жок. Муну текшерүү үчүн мен 30-июлда аянтка барам. Мыйзамдуу түрдө митинг өткөрүүгө уруксат бергичекти биз акимчиликке кайрыла беребиз, — деди Алсерке.

Буга чейин Шымкент акимчилиги активисттердин жер маселеси боюнча митинг өткөрүүсүнө эки сапар тыюу салган. Алар 21-майда эле билдирме берип, 6-июлда акция уюштурууга аракет кылышкан. Бирок максаттары орундалган эмес.