Ташкент соту көчөдө 8 жаштагы кызды өөп, ага карата адепсиз жоруктарды жасаган 63 жаштагы жаранга өкүм чыгарды. Бул тууралуу Өзбекстандын Жогорку Сотунун басма сөз кызматы билдирди.

Быйыл август айында зордук-зомбулук менен күрөшүүгө багытталган Nemolchi.uz долбоору көчөдө эркек киши бейтааныш кыздын чачынан жана мойнунан сылай баштаганы тартылган видео жарыялаган. Жолдон адамдар өтүп баратканда, ал өз кылыгын токтотуп, бирок анысын кайра бир нече жолу кайталаган. Аягында кыздын каршылыгына карабай эрининен зордоп өпкөн.

Окуяны күбөлөр видеого тартып алып, Nemolchi.uz долбоорунун редакциясына жөнөтүшкөнү маалымдалган.

Сот отуруму жабык өттү. Шектүү “16 жашка чыга элек адамга карата зомбулук же коркутуу менен адепсиз жоруктарды жасоо” беренеси боюнча күнөөлүү деп табылды. Ал 5 жыл 4 айга эркинен ажыратылды. Жазасын жалпы режимдеги колонияда өтөйт.

Буга чейин бул берене 2 жылдан 3 жылга чейин түзөтүү жумуштары же 5 жылга чейин эркинен ажыратуу түрүндөгү жазаны камтыган. 2023-жылдын апрелинде сексуалдык эркиндикке жана балдардын кол тийбестигине каршы кылмыштар үчүн жаза катаалдаштырылган.