Бүгүн Берлин шаарында башталган "Борбор Азия – Германия" саммити учурунда чет өлкөлөрдө жашаган оппозициялык маанайдагы борбор азиялык активисттер нааразылык акциясын өткөрүштү.

Алар аймактагы өлкөлөрдүн лидерлеринен "Путинге эл аралык санкцияларды айланып өтүүгө жардам бербөөнү", "Орусиянын Украинага каршы агрессиясын ачык айыптоону" жана "чөлкөмдөгү Кремлдин пропагандасын токтотууну" талап кылышты.

Оппозициялык активисттер мындан тышкары Кыргызстандын, Казакстандын, Өзбекстандын, Түркмөнстандын жана Тажикстандын президенттеринен сөз эркиндигин жакшыртууну, журналисттердин коопсуздугун камсыз кылууну, жарандарды саясий, диний же башка негиздер менен куугунуктоону токтотууну талап кылышты. Акциянын жүрүшүндө ошондой эле бийликти сындаган оппозициялык партиялар менен кыймылдардын президенттик жана парламенттик шайлоолорго катышуусуна мүмкүндүк түзүү талабы да айтылды.

Саммит өтүп жаткан президенттик сарайдын алдына чогулган өзбек активисттери Өзбекстан президентинин картежи өтүп бараткан маалда "Мирзиёев – Путиндин вассалы" деп кыйкырышты. Бул учур тартылган видеону "Эркин Өзбекстан" уюму жарыялады.

Германияда жашаган Раушан Толганбаева аттуу казак жараны "Орусияга санкцияларды айланып өтүүгө жардам берип жатканы үчүн" Касым-Жомарт Токаевдин жеке өзүнө каршы персоналдык санкцияларды киргизүүгө чакырды.

Нараазылык акциялар өткөн президенттик сарайдын алдындагы аянтта оппозиция өкүлдөрүнөн тышкары бийликчил активисттер да жүрдү. Алардын саны кыйла көп болду.