Маңгыстау облусуна караштуу Түпкарагаран районундагы Каражанбас кенин иштеткен Phystech II компаниясынын жумушчулары үч күндөн бери талаада түнөп жатышат. Алар маянаны жогорулатууну талап кылышууда.

15-декабрда мунайчылар компаниянын директору Ернар Байжалиев менен анын орун басары Талгат Кадыровду иштен алууну сурашкан.

«Үч күн суукта турганда автобуска отургула деп айткандан башка эч нерсе сунушташкан жок. Талаптарыбыз аткарылган жок. Мындан ары биз алар менен иштеше албайбыз», — деди жумушчулардын бири.

Вахта ыкмасында иштеген мунайчылар нааразылык иретинде талаага боз үй тигишкен. Аларга полиция келип, боз үйлөрдү алып кеткенде жумушчулар суукта сыртта калып акцияны уланта башташкан. Акимчиликтин өкүлдөрү муну "мыйзамсыз" деп, аларды тарап кетүүгө үндөгөн.

Кээ бир кызматкерлер суукта ооруп, үйлөрүнө кетишти. Калган жумушчулар акцияны полиция көзөмдөп турганын айтышты.

Ишкананын жетекчилиги айлыкты көтөрүү мүмкүн эместигин билдирди. Phystech II компаниясынын юристи Дарига Кибасованын айтымында, "компания банкрот болуу алдында турат".

Компанияга ээлик кылган Кайрат Боранбаев бир канча жыл мурун өз бизнесин Нидерланддагы MKV International b.v. офшордук фирма аркылуу каттаган. Документтерде компаниянын расмий өкүлү катары Боранбаевдин бир тууганы Мурат Боранбаев көрсөтүлгөн.