Бүгүн, 26-июль күнү КР Өкмөтүнүн Жалал-Абад облусундагы ыйгарым укуктуу өкүлчүлүгүндө 2016-жылдын январь-июнь айлар ичинде, облустун социалдык-экономикалык өнүгүүсүнүн жыйынтыгын чыгарган коллегия болуп, анын ишине өкүлдүн биринчи орун басары Мамасалы Акматов, Өкмөттүн Жалал-Абад облусундагы куратору Атай Алманбетов, укук коргоо органдарынын жетекчилери, райондордун акимдери, шаарлардын мэрлери, айыл өкмөт башчылары, мекеме-ишканалардын жетекчилери катышты.

Жарым жылдыкты чыгарган коллегияда өкүлчүлүктүн региондук өнүктүрүү бөлүмүнүн башчысынын милдетин аткаруучу Нурбек Дженалиев баяндама жасады. Анын айтымына караганда, 2016-жылдын I жарым жылдыгынын жыйынтыгы менен салыштырма баада, өнөр жай продукциясынын физикалык көлөмүнүн индекси -100,1 пайыз, айыл чарбасынын  физикалык көлөмүнүн индекси -107,7 пайыз,  негизги капиталга инвестицияларды тартуу – 97 пайыз,  автотранспорт менен жүк ташуу -108,7 пайыз,  жүргүнчүлөрдү ташуу -106,5 пайыз, кызмат  көрсөтүү -104,9 пайыз, чекене товар жүгүртүү -104 пайыз  аткарылды.

- Тармактар боюнча алып караганда, өнөр  жай  тармагында 2016-жылдын январь-июнь айларында, Жалал-Абад облусу боюнча 8781,4 млн. сомдук өнөр жай продукциясы өндүрүлүп, физикалык көлөмдүн индекси 100,1 пайыз, ал эми экономикалык божомолго салыштырмалуу 967,7 млн. сомго көп аткарылган. Жалпы Республиканын көлөмүнөн облустун үлүшү 11,1 пайызды түздү, - деди Н.Дженалиев.