Үстүбүздөгү жылдын биринчи жарым жылдыгынын жыйынтыгы менен шаардын социалдык-экономикалык өнүгүүсүндө өнөр жай тармагынан тышкары  реалдык сектордун бардык тармактарында өсүү темпи жогорулаган. Бул тууралуу Жалал-Абад шаардык мэриясында өткөрүлгөн алты айдын жыйынтыгы боюнча  коллегияда белгилүү болду. 

Жалал-Абад шаардык мэриясынын жергиликтүү экономикалык өнүктүрүү бөлүмүнүн башчысы Салижан Умаровдун билдиришинче, өнөр жай ишканалары тарабынан биринчи жарым жылдын жыйынтыгы менен  1миллиард, 333,2 миллион сомдук продукция өндүрүлүп, өткөн жылга салыштырмалуу өндүрүлгөн продукциянын физикалык көлөмү 66,7пайызды түзгөн.

Шаардын элине 1миллиард, 182,4 миллион сомдук акылуу кызмат көрсөтүлүп өсүү темпи 107 пайызды түздү, чекене соода жүргүзүү көлөмү 4 миллиард, 831,1 миллион сомду түзүп өсүү темпи 101,9 пайызга жетти.

“Ал эми айыл чарба тармагында 77,3 миллион сомдук айыл чарба продукциясы өндүрүлүп, өткөн жылга салыштырмалуу өсүү темпи 112,5 пайызды түздү. Ошондой эле транспорттук мекеме-ишканалар тарабынан  жүргүнчүлөрдү ташуу көрсөткүчү өткөн жылга салыштырмалуу 106,5 пайызга, жүк ташуу 122,3 пайызга өстү”,- дейт С. Умаров.