Кара-Балтадагы “Жунда” мунайды кайра иштетчү заводуна оңдоо иштерин жүргүзүүдө техникалык эрежелерди сактабаганы үчүн административдик айып пул салынды. Бул тууралуу Техникалык жана экологиялык коопсуздук боюнча мамлекеттик инспекциядан кабарлашты.

Маалыматка ылайык, аталган заводдо оңдоо иштерин жүргүзүүдө техникалык эрежелер бузулуп, зыяндуу газдар абаны булгаган. Бул боюнча иликтөө жүрүп, административдик мыйзам бузуу үчүн акчалай айып пул салынды.

Ошондой эле Мамэкотехинспекциядан Ново-Николаевка айылынын тургундарынын арызы каралып жатканын кабарлашты. Аталган айыл тургундары завод тараптан жагымсыз жыт келип жатканына даттанышкан.

"Жунда" заводу Кытайдан келген инвестицияга курулган. Ал жылына 800 миң тонна мунай иштетүүгө ылайыкташкан. Бирок толук кубаттуулукта иштебей келет.