Жапалак айылдык аймактык  башкармалыгынын Тээке айылындагы №45 Мырзаев атындагы орто мектебинин жаңы курулушуна капсула салуу аземи болду. Бул тууралуу шаардык мэриянын басма сөз кызматы билдирди.

Алынган маалыматка караганда, аталган иш-чарага Ош шаарынын мэри Айтмамат Кадырбаев, Ош шаардык кеңешинин төрагасы Жапарбек Ормонов, мекеме-ишканалардын жетекчилери шаар активисттери жана тургундары катышты.

Мырзаев атындагы жаңы мектептин сметалык баасы 45 млн.сом. Ал эми тендердик баасы 29 млн.545 миң 500 сомду түзүп, 275 орунга ылайыкташкан.

Шаар башчысы А. Кадырбаев шаардагы социалдык муктаждыктарды чечүү эң негизги максат экенин айтты.

“Учурда шаардагы жана чет жактагы айылдарга өзгөчө көңүл буруп, социалдык жактан көйгөйлөрдү чечүүнү колго алдык. Жапалак аймагында эле аз убакыттын ичинде төрт бала бакчаны бүтүрүп тапшырдык. Андан тышкары, Мырзаев атындагы мектептин спорттук имаратын бардык шарты менен куруп бердик. Мына эми мектеп башталып олтурат. Кийинки жылы курулуш иштери аяктап, балдарды жаңы мектептин имаратына көчүрөбүз”, - деди А. Кадырбаев.

Айта кетсек, Тээке айылында башталган №45 Мырзаев атындагы жаңы мектеп 2017-жылы колдонууга берилет. Мындан тышкары жакынкы аралыкта Жапалактын Пятилетка жана Озгур айылдарындагы бала бакчалар шаардыктарга тапшырылат.

Белгилей кетсек, Жапалак айылдык аймактык башкармалыгынын калкынын саны 28 254, ал эми Тээке айылында 4500 эл жашайт.