Адвокаттар "Биринчи каналдын" редактору Марина Овсянникованы таппай жатышат. Бул тууралуу "Медуза" басылмасы "Агора" уюмунун адвокаты Даниил Берманга шилтеме берүү менен билдирди.

Овсянникова 14-март күнү кечинде "Время" программасынын түз эфирине согушка каршы плакат көтөрүп чыккан. Ал "Согушту токтоткула, пропагандага ишенбегиле, бул жерде сиздерге калп айтып жатышат" деп айтууга үлгүргөн.

Буга чейин Овсянникова Москванын Останкино райондук ички иштер бөлүмүнө жеткирилгени кабарланган. Бирок полициячылар укук коргоочуларга ал бөлүмдө жок экенин айтышкан.

Адвокат Даниил Берман "Медузага" 15-март күнү эртең менен Овсянникованы "Останкинонун" нөмөөт бөлүмүнөн да, шаардын башка полиция бөлүмдөрүнөн да таба алышпаганын кабарлады.

"Холод" басылмасы адвокат Павель Чиковго шилтеме берүү менен Марина Овсянникова 12 сааттан бери дайынсыз болуп жатканын жазды.

14-март күнү кечинде "Биринчи каналдын" кызматкери Марина Овсянникова "Время" программасынын түз эфиринде согушка каршы акция өткөрүүгө үлгүргөн. Ал алып баруучу Екатерина Андрееванын артына антисогуштук плакат көтөрүп чыккан. Баракчада: "No war. Остановите войну. Не верьте пропаганде. Здесь вам врут. Russians against war", деп жазылган. Андреева бул маалда батыш санкцияларынын кесепеттерин жумшартуу боюнча өкмөттүн пландарын айтып жаткан. Бир нече убакыттан соң режиссерлор эфирди алдын ала даярдалган маалыматтар менен алмаштырган.

Овсянникова дароо кармалган. Бейрасмий маалыматтарга караганда ал "орус аскерлерин дискредитациялоо" тууралуу административдик мыйзам бузуу кодексинин негизинде административдик жоопкерчиликке тартылышы мүмкүн. Буга чейин адвокат Даниил Берман Овсянниковага кылмыш иши да козголушу ыктымал экенин айткан.

Украинанын президенти Владимир Зеленский өзүнүн жаңы видеокайрылуусунда Овсянниковага бул аракети үчүн ыраазычылык билдирди.

"Мен чындыкты жеткирүүнү токтото элек орусиялыктарга... жеке "Биринчи каналдын" студиясына согушка каршы плакат менен кирип барган ошол кызга ыраазымын. Нааразылык билдирүүдөн коркпогондорго айтарым, силер күрөшүшүңөр керек, силер мүмкүнчүлүгүңөрдү жоготпошуңар керек. Азырынча силердин өлкө бүт дүйнөгө толук жабыла элек", – деди ал.